Фарғонада 100 дан ортиқ қиморбоз қўлга олинди
Улар қимор ва таваккалчиликка асосланган лотто ўйинини ташкил қилгани аниқланган.
Фарғона вилоятининг Фарғона ва Марғилон шаҳарларида қиморбозлик билан шуғулланган бир гуруҳ шахслар ушланди. Бу ҳақда вилоят Ички ишлар бошқармаси хабар қилди.
Қайд этилишича, Фарғона вилояти ИИБ, вилоят ДХХ, Миллий гвардия ходимлари томонидан тезкор тадбир ўтказилган. Унда Фарғона шаҳар Саноат кўчасида жойлашган уйнинг иккинчи қаватида Марғилон шаҳрида яшовчи фуқаро 5 та таниши билан ноқонуний ҳаракатларни содир қилган.
Улар 42 нафар фуқарони жалб қилиб, қимор ўйинлари ўтказиб келган. Улардан жами 12 миллион 247 минг сўм ва 17 хил буюм ашёвий далил сифатида олинган.
Шу куни тадбирлар давомида Марғилон шаҳри "Ўрдатаги" маҳалласи Мустақиллик кўчасидаги овқатланиш биносининг иккинчи қаватида шу шаҳарда яшовчи фуқаро 3 нафар таниши билан лотто қимор ўйинини ташкил қилгани аниқланган. Улар 49 нафар фуқарони жалб қилган ҳолда, қимор ўтказиб келаётганда тадбир иштирокчилари томонидан далилий ашёлар билан қўлга олинган.
Ҳар икки ҳолат юзасидан Жиноят кодексининг 278-моддаси (қимор ва таваккалчиликка асосланган бошқа ўйинларни ташкил этиш ҳамда ўтказиш)нинг тегишли қисмлари билан жиноят иши қўзғатилган.
Эслатиб ўтамиз, аввалроқ Тўйхона ертўласини қиморхонага айлантирган шахсга чора кўрилгани ҳамда Фарғонада қиморхона ташкил этган шахс ушлангани ҳақида хабар берилганди.
