"UzAuto Motors" 440 млрд сўмни тежаб қолди

 

"UzAuto Motors" АЖ таркибига кирувчи тизим корхоналарда коррупцияга оид ҳуқуқбузарликнинг ўз вақтида олдини олиш, аниқланиш ва уларга чек қўйишни таъминлашга алоҳида эътибор қаратилмоқда.

 

Маълумотларга кўра, "UzAuto Motors" компаниясида коррупцияга қарши курашиш бўйича комплаенс тизими 2019 йилда халқаро стандартлар ва қонунчилик тамойилларига асосан жорий қилинган. Мутахассислар шартли равишда мазкур назорат тизими иш бошлаган даврни икки босқичга бўлишади. Биринчи босқичда соҳани ривожлантиришга тўсқинлик қилувчи, коррупцияга мойиллик ва имкон берувчи омиллар ҳамда компанияда йўқотишларга олиб келаётган факторлар аниқлаб олинган.

 

Фурқат Муродов, "UzAuto Motors" АЖ назорат хизмати раҳбари:

— Давлатимиз раҳбарининг қарорлари билан давлат улуши бор ташкилотларда комплаенс тизимини жорий қилиш бўйича фармон чиқди. Унда бир қанча вазифалар белгилаб берилди. Олиб борилган ўрганишлар натижасида айнан комплаенс йўналишида фаолият олиб борган ходимлар томонидан компаниямизга 440 млрд иқтисодий самара келтирди. Бу йили давлатимиз раҳбари томонидан олдимизга белгилаб берилган вазифалар яъни маҳсулот тан нархини 5% га камайтириш, импорт ҳажмини тушириш, шунингдек навбатларни кескин камайтириш бўйича ишлашни давом этамиз.

 

2021 йилга келиб, комплаенс тизимининг икки йиллик ишлари сарҳисоб қилинганда 9 та асосий йўналиш, яъни харид, маркетинг, ишлаб чиқариш, хавфсизлик ва рақамлаштириш каби йўналишларда коррупцион хавфлар борлиги аниқланган. Қисқа давр мобайнида компания мутахассислари гуруҳи ўтказилган дастлабки ўрганишлар натижасида бир қанча асоссиз харажатларнинг олдини олишга муваффақ бўлишган.