Арманистон ва Туркия “дўстлашмоқда”

Арманистон ва Туркия ҳеч қандай шартларсиз муносабатларни нормаллаштириш устида ишлашга тайёрлигини тасдиқлади. Бу ҳақда Арманистон ташқи ишлар вазири Арарат Мирзоян Анталияда Туркия ташқи ишлар вазири Мевлут Чавушўғли билан учрашувдан сўнг маълум қилган.

 

“Учрашувимиз чоғида биз ҳар икки томон ўзаро муносабатларни ўрнатиш ва чегараларни ҳеч қандай шартларсиз очиш мақсадида келишув жараёнини давом эттиришга тайёрлигини тасдиқладик” , деди Мирзоян.

 

У Арманистон ва Туркия вакиллари бу борада иш олиб бораётганини таъкидлаб, яқин келажакда ижобий натижаларга умид билдирди. 

“Минтақадаги барча халқлар, барча давлатлар минтақамизда тинчлик ва барқарорлик ўрнатишга интилаётганини кўриб хурсандман. Ва шуни айтмоқчиманки, Арманистон тинч ва барқарор минтақага эга бўлишга тайёр”, дея қўшимча қилди вазир.

 

Малумот учун: Умумий чегарага қарамай, Арманистон ва Туркия ўртасида дипломатик алоқалар мавжуд эмас. 2009 йилда Тсюрихда икки давлат ташқи ишлар вазирлари дипломатик муносабатлар ўрнатиш ва муносабатлар тамойиллари тўғрисидаги протоколларни имзолаган, бироқ бу ҳужжатлар томонлар томонидан ратификация қилинмаган. 2018 йил 1 март куни Арманистон протоколлар бекор қилинганлигини эълон қилди. 2021 йилда Арманистон ва Туркия келишув масалалари бўйича махсус вакилларни тайинлади. Туркиянинг АҚШдаги собиқ элчиси Сердар Қилич бу лавозимни Анқарада, Еревандан эса парламент спикери ўринбосари Рубен Рубинян эгаллади.

Ереван ва Анқара вакиллари биринчи учрашувини 14 январь куни Москвада, иккинчи учрашувини 24 феврал куни Венада ўтказди. Ереван музокаралар жараёни динамикасини ижобий баҳолаб, Туркия билан чегаранинг очилиши Арманистон томони учун устувор вазифа эканини қайд этди.