Яман хусийлари Саудия нефть объектларига ҳужум қилди
Ҳужум қанотли ракеталар ёрдамида амалга оширилган.
Яманнинг хусийлар ҳаракати Саудия Арабистонига ракета зарбалари берди. Бу ҳақда ҳаракат расмий вакили Яҳё Сариа маълум қилди.
Унинг сўзларига кўра, ҳужум "Қамални ёриб ўтиш — 2" операцияси доирасида амалга оширилган. Зарбалар Жизондаги стратегик объектларга берилган. Шунингдек, Жиддада жойлашган дунёдаги энг йирик Saudi Aramco нефть компаниясига ҳам зарар етказилган. Зарба компаниянинг нефть тақсимлаш станциясига берилгани айтилмоқда.
Араб коалицияси давлатлари якшанбага ўтар кечаси Қизил Денгиз соҳилидаги Аш-Шукик ва Жизондаги Saudi Aramco объектларига дронлар ва баллистик ракеталар ёрдамида ҳужум бўлганини, аммо уларнинг барчаси уриб туширилганини очиқлаган.
Саудия Арабистони энергетика вазирлиги Янбу шаҳридаги нефть қайта ишлаш заводи фаолияти вақтинчалик тўхтатилганини эълон қилган.
Аввалроқ хусийлар БААга ҳам ҳужум уюштирганди.
