Байден Варшавада украиналик қочқинлар билан учрашди
Президентнинг айтишича, болалар ундан уруш зонасидаги яқинлари учун ибодат қилишини сўраган.
АҚШ президенти Жо Байден Польшага сафари чоғида Варшавадаги “Миллий” стадионга ташриф буюриб, у ерда украиналик қочқинлар ва кўнгиллилар билан учрашди.
Қочқин болалар Байденга “Дадам учун, акам учун ва бобом учун ибодат қилинг, чунки улар у ерда жанг қилмоқдалар”, деб мурожаат қилган. Президентнинг журналистларга айтишича, унинг ўзи ҳам уруш зонасида яқин инсони бўлиш қандай эканлигини яхши билади.
Шунингдек, учрашувда Байден Россия Президенти ҳақидаги саволга ҳам жавоб бериб, уни “қассоб” деб атаган.
Аввалроқ Байден Польшада Украина вазирлари Дмитрий Кулеба ва Олексий Резников билан учрашгани хабар қилинганди. Америка президенти Россия билан уруш бошланганидан бери Украинанинг юқори мартабали вакиллари билан илк учрашувини ўтказди.
