Қайси давлатлар Украина хавфсизлиги кафолатчиси бўлишга тайёр?
Зеленский бу ҳақда маълумот берди.
Украина президенти Владимир Зеленский Киев қатор давлатлар билан хавфсизлик кафолати бўйича ҳужжат лойиҳасини алмашганини маълум қилди. Бу ҳақда у Fox News телеканалига берган интервьюсида айтиб ўтди.
"Бизга етакчи давлатлар томонидан хавфсизлик кафолатлари керак. Биз буни истаётган давлатларнинг АҚШ, Буюк Британия, Германия, Франция ва Туркия сафига қўшилишга таклиф қиламиз", — деган у. Зеленскийнинг сўзларига кўра, бу давлатлар хавфсизлик кафолатчиси бўлишга розилик билдирган. Шунингдек, Исроил ва Ирландия ҳам кафолатчи давлатларга айланиши мумкин. "Биз Хитойнинг ҳам қўшилишини истардик", — деб қўшимча қилган Украина етакчиси.
Шу билан бирга у Россия хам бу шартномадан ўрин олиши кераклигини, чунки бу энг аввало Киев ва Москва ўртасидаги келишув эканини айтган. Зеленскийнинг фикрича, эҳтимолий шартнома Россияга маълум мажбуриятларни юклаши лозим.
Аввалроқ Буюк Британиянинг Украина ва Россия ўртасида тинчлик шартномаси имзоланишига қарши экани маълум бўлганди.
