Украина Москвани Мисрни ғалласиз қолдиришда айблади
Миср дунёнинг энг йирик буғдой импорт қиладиган давлатларидан бири.
Украинанинг Қоҳирадаги элчихонаси Россияни Миср учун буғдой ортилган кемани ушлаб қолишда айблади. Бу ҳақда элчихонанинг расмий Twitter аккаунтида маълум қилинган.
"Россия Мисрга томон кетаётган ва Украина ғалласи ортилган кемани блоклаб қўйди", — дейилади баёнотда. Кема Marine Traffic портали томонидан кузатилган. Унга Панама байроғи остидаги Emmakris III кемаси ҳамроҳлик қилмоқда. Ҳозирда у Черноморскда турибди. Кема 22 февралдан бери шу жойдан қўзғалмаган.
Ўз навбатида РФнинг Мисрдаги элчихонаси бу айбловларни рад этди. Унга кўра, Одесса ва Черноморскдаги кемаларни Украинанинг ўзи ушлаб турибди.
Маълумотларга кўра, ғалла Миср томонидан 15 февралдан 3 мартга қадар сотиб олинган 300 минг тонна буғдойнинг бир қисми ҳисобланади.
Миср дунёнинг энг йирик дон истеъмолчиларидан бири. Мамлакат ҳар йили 11 миллион тонна буғдой импорт қилади, жами истеъмол кўрсаткичи — 18 миллион тонна. Ушбу араб давлатига асосий экспортёр давлатлар Россия ва Украина ҳисобланади. Хусусан, 2021 йил Москва Қоҳирага 8.2 миллион тонна буғдой сотган (импортнинг 74.5 фоизи). Украина улуши 20 фоизни ташкил этади.
Аввалроқ Жаҳон савдо ташкилоти дунёда жиддий озиқ-овқат танқислиги бўлишидан огоҳлантирганди.
