Европа Иттифоқи Россия билан дипломатик алоқаларни давом эттириш ниятида
Шу била бирга Россияга қарши янги санкциялар ҳам жорий этилади.
Европа Иттифоқи Россия билан дипломатик алоқаларни давом эттириш зарур деб ҳисоблайди. Бу ҳақда Брюсселда бўлиб ўтган брифингда Европа Иттифоқи ташқи ишлар хизмати вакили Питер Стано маълум қилди.
"Биз Россия президентини муаммога сабабчи деб биламиз. Шунинг учун муаммони ҳал қилишда у билан алоқаларни давом эттириш керак. Европа Иттифоқи дипломатия каналларини очиқ қолдириш зарур деб ҳисоблайди" — деди Питер Стано.
У Европа Иттифоқи бир вақтнинг ўзида Россия Федерациясига қарши янги санкциялар бўйича ишларни тезлаштириш ниятида экани тасдиқлади. Бироқ уларнинг мумкин бўлган мазмунини изоҳлашдан бош тортди. Унинг қайд этишича, Европа Иттифоқининг бир қатор давлатлари ва ЕИ Ташқи ишлар хизмати раҳбари Жосеп Боррел Бучадаги вазият ҳақидаги хабарларга таяниб, Россияга қарши санкциялар қўллашни кучайтиришни таклиф қилган.
Маълумот учун: 3 апрел куни Россия Мудофаа вазирлиги Киев режимининг Бучада тинч аҳолини ўлдирганликда айблаганини рад этди. Департаментнинг таъкидлашича, Россия Қуролли кучлари 30-март куни Бучани тўлиқ тарк этган ва “жиноят далиллари” Украина Хавфсизлик хизмати ходимлари шаҳарга келган тўртинчи кунигина пайдо бўлган.
Россия Мудофаа вазирлиги, шунингдек, 31 март куни Буча мэри Анатолий Федорук ўзининг видеомурожаатида шаҳарда россиялик ҳарбийлар йўқлигини тасдиқлаганини, бироқ кўчаларда отиб ўлдирилган маҳаллий аҳолини тилга ҳам олмаганини таъкидлади.
