Қувайт Ливанга ўз элчисини қайтаради
Икки давлат муносабатлари 2021 йил октябрида ёмонлашган эди.
Қувайт ўз элчисини Ливанга қайтаришга қарор қилди. Бу ҳақда мамлакат ташқи ишлар вазирлиги хабар тарқатди.
"Ливандаги мўтадил миллий кучларнинг чақириқлари ва бош вазирнинг Қувайт ҳамда бутун Форс кўрфази араб давлатлари ҳамкорлик кенгаши билан ҳамкорликни мустаҳкамлаш бўйича мажбуриятларини ҳисобга олиб биз ўз элчимизнинг Байрутга қайтишини эълон қиламиз, — дейилади вазирликнинг Twitter саҳифасида.
Маълумот ўрнида: Ливаннинг араб давлатлари билан муносабатлари мамлакатнинг собиқ ахборот вазири Жорж Кордахининг 2021 йил октябрида Ямандаги хусийларнинг ҳаракатларини оқлаб чиққани ортидан ёмонлашганди. Дастлаб Саудия Арабистони, кейинчалик Баҳрайн, Қувайт ва БАА ўз элчиларини Байрутдан чақириб олганди.
2022 йил 22 январь куни Қувайт ташқи ишлар вазири Аҳмад Носир ас-Сабоҳ Ливанга ташриф билан келади ва мамлакат президенти Мишель Аунга араб давлатлари билан муносабатларни яхшилаш шартларини маълум қилади.
Аввалроқ Араб давлатлари Россия-Украина ўртасида воситачи бўлишга тайёрлиги тўғрисида хабар берилганди.
