Путинни НАТОга таклиф қилганман — Билл Клинтон
Шунингдек, АҚШ собиқ президенти альянснинг Шарққа кенгайтирилиши тўғри қарор бўлганини айтди.
АҚШ собиқ-президенти Билл Клинтон НАТОнинг Шарққа кенгайтириш тўғри қарор бўлганини маълум қилди. Бу ҳақда у The Atlantic нашрига берган интервьюсида айтган.
“Сўнгги вақтларда НАТОнинг кенгайтирилишини турли доираларда танқид қилишмоқда. Уларнинг фикрича, айнан шу омил Путиннинг Украинага ҳужум қилишига сабаб бўлган. аммо альянс кенгайтирилиши босқичма-босқич бўлган ва мен уни тўғри қарор деб ҳисоблайман”, – деган Клинтон.
Собиқ президент, шунингдек, унинг бу қарорига кўпчилик қарши бўлганини таъкидлаган.
“Мен бу таклиф (НАТОни кенгайтириш)ни берганимда кўпчилик бошқача фикр билдирган. Хусусан, афсонавий дипломат Жорж Кеннан Берлин девори қулаши ва Варшава шартномаси ташкилоти тугатилиши билан НАТО ўз функциясини бажарди деб ҳисоблаган. The New York Times таҳлилчиси Том Фридман эса альянснинг кенгайиши ортидан Россия ўзини ҳақоратланган деб хис қилишини ва иқтисодий томондан ўзини ўнглаб олгандан сўнг биз даҳшатли жавоб олишимиздан огоҳлантирганди”, – деб қайд этган у.
Клинтоннинг сўзларига кўра, у қайта низо юз бериш эҳтимоли борлигини билган. Шу билан бирга собиқ президент Россиянинг биринчи президенти Борис Ельцин ва амалдаги раҳбар Владимир Путинни НАТОга аъзо бўлиш учун эшиклар очиқлигини айтганини маълум қилган.
Аввалроқ Россия билан муносабатлар масаласида НАТО давлатлари иккига ажралгани тўғрисида хабар берилганди.
