Арманистон билан тезроқ музокара бошлаш керак — Алиев
Озарбайжон президенти Арманистонни тинчлик шартномаси бўйича музокараларни бошлашга чақирди.
Озарбайжон ва Арманистон яқин келажакда тинчлик келишуви бўйича аниқ музокараларни бошлаши керак, деди Президент Илҳом Алиев.
“Биз Арманистон билан фақат ўзимиз таклиф қилган бешта асосий тамойил асосида тинчлик келишуви бўйича музокаралар олиб бориш ниятидамиз. Ҳозирда икки давлат ташқи ишлар вазирликлари ишчи гуруҳларни шакллантириш билан шуғулланмоқда. Менимча, бу борада аниқ музокараларни бошлаш керак. Тинчилик шартномаси фақат бешта асосий тамойил асосида имзоланади. Битим матни тез орада тайёрланиб, имзоланиши мумкин”,— деган Алиев Конгрессда.
Унинг сўзларига кўра, шу йўл билан Озарбайжон ва Арманистон ўртасида дипломатик алоқалар ўрнатилиши мумкин.
Алиев, шунингдек, Арманистон Озарбайжоннинг ҳудудий яхлитлигини ва унга қарши ҳудудий даъволар йўқлигини расман тан олиши кераклигини таъкидлади.
