АҚШнинг биринчи хоними Руминияга ташриф буюрди
У сафари чоғида украиналик қочқинлар билан учрашган.
АҚШ биринчи хоними Жилл Байден Руминия пойтахти Бухарестга сафари чоғида мактабларга ташриф буюрди. У бир гуруҳ украиналик қочқин оналар билан учрашди.
У аёлларни кучи ва чидамлилиги учун мақтаган.
Виржиниядаги жамоат коллежида инглиз тили ва ёзувдан дарс берадиган Байден хоним Руминия ва Словакия бўйлаб сафарда бўлиб, бу мамлакатларда жойлаштирилган америкалик ҳарбийлар ва қочқинлар билан учрашмоқда. Президент Жо Байденнинг рафиқасига Руминиянинг биринчи хоними Кармен Ёханнис ҳамроҳлик қилди.
Россия босқинини бошлаганидан бери 910 мингга яқин украиналиклар Руминияга қочиб ўтди. Хайрия ташкилотлари, маҳаллий ҳокимият ва давлат идоралари озиқ-овқат, бошпана ва транспорт билан таъминлаш учун минглаб кўнгиллилар билан бирга иш олиб бормоқда.
