Беларусь Евроиттифоқ билан “ярашиш” ниятида
Минск санкциялар занжирини узишга умид қилмоқда.
Беларусь Берлин ва Европа Иттифоқи билан мулоқотни конструктив йўлга қайтариш ва санкциялар занжирини узишни мақсад қилган. Бу ҳақда Беларуснинг Германиядаги элчиси Денис Сидоренко маълум қилди.
“Умид қиламизки, биз санкцияларга асосланган муносабатларнинг салбий спиралини бузиб, Берлин ва ЕИ билан мулоқотимизни тиклай оламиз”, — деган у.
У Беларуснинг Германия ва Европа Иттифоқи билан бугунги кундаги муносабатларини жуда қийин деб атади ва иқтисодий алоқалар, барқарор ривожланиш бўйича ҳамкорликка тайёрлигини билдирди.
“Биз немис ҳамкасбларимизни бу соҳалар ҳар икки томон манфаатларига, шунингдек, мамлакатларимиз фуқаролари манфаатларига мос келишига ишонтиришга ҳаракат қилмоқдамиз”, — деди Сидоренко.
