Шимолий Корея учта баллистик ракета учирди
Тахмин қилинишича, Пхеньян ядро синовини ўтказишга тайёрланмоқда.
Шимолий Корея учта баллистик ракета учирди. Парвозларнинг максимал баландлиги тахминан 100 км бўлган. Бу ҳақда Япония мудофаа вазири Нобуо Киши маълум қилди.
“Шимолий Корея шарқий йўналишда учта баллистик ракетани учирди. Улар тахминан 350 км масофани босиб ўтган ва Япониянинг эксклюзив иқтисодий зонасидан ташқарига тушган”, — деди вазир.
Унинг таъкидлашича, КХДРнинг бундай ҳаракатлари Япония ва бутун халқаро ҳамжамият тинчлиги ва хавфсизлигига таҳдид солади.
“Шу муносабат билан биз Пекиндаги элчихона орқали норозилик билдирдик”, — дея қўшимча қилган у.
Эслатиб ўтамиз, йил бошидан бери Пхенян ўндан ортиқ ракета синовларини ўтказди. Шунингдек, Шимолий Кореяда сўнгги беш йил ичида илк бор ядро синовини ўтказишга ҳозирлик кўрилаётгани маълум қилинди.
