Туркманистонда қўл ушлашиб юрган йигит-қизлар ҳибсга олинмоқда

 

Туркманистоннинг Марям шаҳрида ўнлаб жуфтликлар жамоат жойларида қўл ушлашгани учун қўлга олинди. Бу ҳақда “Медуза” нашри хабар берди.

 

Қайд этилишича, полиция ходимлари уларни “анъанавий ижтимоий меъёрлар”ни бузганликда айблаган. Ҳибсга олинганлар келажакда ўз ҳис-туйғуларини ошкора кўрсатмаслик ваъдаларига имзо чекканлари учун қўйиб юборилган. 

 

Таъкидланишича, Туркманистонда қўл ушлашиш расман тақиқланмаган. Сердар Бердимуҳамедов ҳокимиятга келганидан сўнг мамкакатда аҳоли, айниқса, аёлларнинг хулқ-атвори ва ташқи кўриниши устидан назорат кучайтирилган. Апрел ойидан бошлаб лаб катталаштириш ёки татуировка каби косметик операцияларга тақиқ жорий қилинган. 

Давлат корхоналари ходимлари ишдан бўшатиш таҳдиди остида косметикани рад этиш тўғрисида тилхат ёзишга мажбур бўлишган. Ўрта мактаб ўқувчилари ўртасида маникюр ва педикюрга йўл қўйилмаслиги ҳақида "тушунтириш суҳбатлари" ўтказилган. 

Бундан ташқари, расмийлар аёлларга автомобилнинг олдинги ўриндиғига ўтиришни тақиқлаган. Ҳайдовчиларга ҳам эндиликда қариндошлари бўлмаган аёлларни олиб юришига рухсат берилмайди: йўл ҳаракати полицияси аёллар бўлган жойда машиналарни тўхтатиб, ҳайдовчи билан қариндошлик алоқаларини исботлашни талаб қила бошлаган.

Ҳукуматга яқин манбаларга кўра, расмийлар аёлларнинг хорижга чиқишини тақиқлаш масаласини ҳам кўриб чиқмоқда. Шунда улар хорижда даволанишга муҳтож бўлган тақдирдагина Туркманистонни тарк этишлари мумкин бўлади.