Янги ўқув йилидан мактаб формаси тўлиқ жорий этилади
Кам таъминланган оила фарзандларига форма сотиб олишда ёрдам берилади.
Вазирлар Маҳкамасининг 19 май кунги қарорига кўра, 2022/2023 ўқув йилидан давлат мактабларида ўқувчилар учун мактаб формаси тўлиқ жорий этилади. Бу ҳақда Адлия вазирлигининг “Ҳуқуқий ахборот” телеграм-каналида маълум қилинди.
Қайд этилишича, 2022 йил 1 июнгача ҳудудлар кесимида янги ўқув йилида мактаб формаларига эҳтиёж аниқланади. Кам таъминланган оилалар фарзандлари учун мактаб формаси маҳаллий бюджет ҳамда “Темир дафтар”, “Аёллар дафтари” ва “Ёшлар дафтари” жамғармалари маблағлари ҳисобидан сотиб олинишида кўмаклашилади.
Шунингдек, 2022 йил 10 августдан ҳар бир туман (шаҳар)да мактаб формаси ишлаб чиқувчиларнинг савдо шохобчалари ташкил этилади.
Эслатиб ўтамиз, давлат мактаблари ўқувчилари учун ягона мактаб формаси шакллари Ҳукуматнинг 15.08.2015 йилдаги 666-сон қарори билан тасдиқланган.
