Самарқанддаги автоҳалокатда 4 ёшли қиз вафот этди

Самарқанд вилоятининг Оқдарё туманида ўлим билан боғлиқ йўл-транспорт ҳодисаси содир бўлди. Бу ҳақда вилоят ИИБ ахборот хизмати маълум қилди. 

Хабарда айтилишича, воқеа жорий йилнинг 31 май куни содир бўлган. 15 ҳамда 4 ёшли қизалоқлар туманнинг Кумушкент маҳалласи ҳудудидаги пиёдалар ўтиш жойидан йўлни кесиб ўтаётганда катта тезликда ҳаракатданиб келган Нексия автомашинаси 4 ёшли қизчани уриб юборган. 

Ҳодиса оқибатида қиз оғир тан жароҳатлари билан туман тиббиёт бирлашмасига ётқизилган ва шу ерда вафот этган. Қоидабузар ҳайдовчи қизларни шифохонада қолдириб, ўзи эса қочиб кетган.

 
Самарқанд вилояти ИИБ ЙҲХБ ходимларининг тезкор қидирув-суриштирув ишлари натижасида мазкур йўл-транспорт ҳодисасини содир этган этган ҳайдовчи топилган. Ҳозирда у билан тергов ҳаракатлари олиб борилмоқда. 

“Ўзимни умуман йўқотиб қўйдим. Кейин бирдан қўрқиб машинага ўтирдим-да кетдим”, — дейди 27 ёшли ҳайдовчи. 

Марҳуманинг онасининг айтишича, қизча боғчага чиқаман деб, опасига қўшилиб кетган. 15-20 минут ўтиб, унинг автоҳалокатга учраганини ҳақида хабар етиб келган. 

Эслатиб ўтамиз, бундан олдин Самарқанд шаҳрининг Фирдавсий кўчасида Нексия ҳайдовчиси йўлни кесиб ўтаётган пиёдани уриб юборганди. Оқибатда фуқаро тан жароҳатлари билан шифохонага ётқизилган. 

Жавоҳирбек ТУРСУНОВ