Австрия ва Германия вақтинча кўмирга қайтмоқда
Европада «яшил» энергияга ўтиш жараёни секинлашиши мумкин.
Австрия ва Германия газ истеъмолини камайтириш ва Россия энергия ресурсларига қарамликни қисқартириш мақсадида иссиқлик электр станцияларига кўмирни вақтинча қайтармоқда.
Австрия ҳукумати Меллах шаҳрида икки йил аввал тўхтатилган кўмир электр станциясини қайта ишга туширишни режалаштирмоқда. Австрияда Россия газининг улуши импортнинг 80% ни ташкил қилади.
«Биз кўмир ишини тиклаш учун ушбу электр станциясини қайта жиҳозлаймиз. Энергия таъминотида узилишлар бўлган тақдирда бу станцияни қайта ишлатиш мумкин. Шунинг учун ҳозир қарор қабул қилиш муҳим. Ҳар ҳолда, техник модернизация ва тайёргарлик кўриш учун бир неча ой керак бўлади», — деди Австриянинг атроф-муҳитни муҳофаза қилиш вазири Леоноре Гевесслер.
8 июлдан Германияда кўмирда ишлайдиган электр станцияларининг вақтинча фаол ишлаши тўғрисидаги қонун лойиҳаси қабул қилинади.
Иқтисодиёт вазири Роберт Хабек вазият оғир эканини, қишда тақчилликка йўл қўймаслик учун энергия сарфини камайтириш ва ерости газ омборларини тўлдириш кераклигини айтди. «Яшиллар» вакили Хабекнинг фикрича, кўмирга қайтиш жуда долзарб масала.
