Кўнгиллилар Афғонистондаги болалар учун кўчма мактаблар ташкил этмоқда
Афғонистондаги йиллар давомида давом этаётган ҳарбий тўқнашувлар ва сиёсий инқирозлар сабаб, кўпинча қишлоқ болаларининг ҳаммаси ҳам мактабга бориб, таълим ололмайди.
Бу ҳақда Анадолу агентлиги маълум қилди
БМТ Гуманитар масалаларни мувофиқлаштириш бошқармасининг январь ойидаги ҳисоботига кўра, мамлакатда мактаб ёшидаги 7,9 миллион бола таълим муассасаларига киришда жиддий қийинчиликларни бошдан кечирмоқда.
"Қалам йўли" уюшмаси 2009 йилда бу муаммони бартараф этиш мақсадида ташкил этилган. Бу ўнлаб мактабларни қайтадан кашф этишга ҳисса қўшди. Шунингдек, кўчма мактаблар ва кутубхоналар яратди. Уюшма айни пайтда Қандаҳорнинг Маъруф ва Спин Болдак туманларидаги 16 қишлоққа хизмат кўрсатмоқда. Кўнгилли ўқитувчилар ҳар куни қишлоқлар бўйлаб китоблар ва ўқув материаллари ортилган заранжлар деб номланган уч ғилдиракли машиналарда юриб, Афғонистон Таълим вазирлигининг ўқув дастури асосида болаларга сабоқ беришади.
"Толибон" ҳокимият тепасига келишидан олдин, уюшма болалар таълим олиш имкониятидан маҳрум бўлган можаро ҳудудларида жойлашган қишлоқларга алоҳида эътибор қаратган. Ташкилот қизларнинг мактабга бориши учун ижтимоий акциялар ҳам уюштирди.
"Қалам йўли" ҳудуд етакчилари, жамоат ва диний арбоблар, шунингдек, турли соҳалардаги тадбиркорлар ва кўнгиллилардан ёрдам олади.
Ҳозиргача "Толибон" 7-12 ёшли қизларни мактабга киришига рухсат бермаган. Уюшма бу муаммога ҳам эътибор қаратди: турар-жой биноларида ўзгартирилган синфларда улар учун "махфий мактаблар" яратди.
Аммо минглаб болаларга таълим олиш имкониятини берган ассоциация халқаро ҳамжамиятнинг ёрдамига муҳтож.
Уюшма раҳбари Матиулла Васа шундай дейди:
“Ҳозир Афғонистонда вазият жуда оғир. Бизга ёрдам керак. Афғонларнинг ўзлари қўлидан келган ҳамма нарсани қила олиши учун бу ишни бошладик. Биз ўқитувчилар бўлмаган жойда машғулотларни ташкил қиламиз. Чекка ҳудудлар учун кўчма мактаблар болаларнинг билим олиши учун ягона умиддир”.
Унинг айтишича, Пен Патҳ қизларни ўқитиш учун онлайн дарслар очишни режалаштирмоқда ва ҳукуматдан мактаб таълимига эътиборни кучайтиришни талаб қилмоқда:
“Биз "Толибон"га қизлар учун мактаблар очиш зарурлиги, уруш туфайли сўнгги 20 йил давомида таълим муассасами йўқ жойларда мактаблар қуриш, шунингдек, таълимни ривожлантириш учун махсус бюджет маблағлари ажратиш ҳақида гапиряпмиз".
Кўчма мактабнинг кўнгилли ўқитувчиларидан бири Мадина. У нима учун бу фаолиятни танлаганлиги ҳақида гапирди:
“Афғонистон тараққиёти учун қилинадиган ишлар кўп. Аёл ўқитувчилар етишмаслиги сабаб миллионлаб қизлар мактабга бориш имкониятидан маҳрум. Улар мамлакатнинг аксарият ҳудудларида мавжуд эмас. Қизлар ўрганиши учун бу ерда дарс беришни бошладим".
Унинг қўшимча қилишича, болаларнинг ўрганишга иштиёқи катта.
"Кўчма мактабда ўқувчиларга дарс берсам, уларнинг юзларида бахт ва умидни кўраман", – дейди у.
Баҳринисо Мадумарова
