Mercedes-Benz Россиядаги активларини сотиб юбориши мумкин

 

Mercedes-Benz автомобиль концерни «Мерседес-Бенц Рус»нинг Россиядаги филиали мулкини дилерлардан бирига сотиши мумкин. Бу ҳақда «Коммерсантъ» манбалари хабар берди.

 

Қайд этилишича, потенциал харидорлар орасида «Панавто», «Автодом», «Авилон» ва «Мейджор» бор. Нашр суҳбатдошларининг фикрича, битим дистрибютор ҳуқуқларини дилерга ўтказиш схемасидан ўтиши мумкин. Шунингдек, «Мерседес-Бенц Рус» автоулов омбори ва дилерлик марказини аукционлар орқали дилерларга сотиши мумкин.

 

Эҳтимолий келишувга Россиядаги март ойидан бери ёпилган Mercedes-Benz заводи кирмайди. Унда Украинага ҳужум ва санкциялар фонида ишлаб чиқариш тўхтатилган.

 

Компания расмий равишда Россияда бизнес юритиш учун турли хил вариантларни кўриб чиқаётганини маълум қилди. Автомобиль ишлаб чиқарувчиси «ҳали аниқ қарорлар йўқ», дея тушунтирди.

 

Маълумотларга кўра, «Панавто» дилери «Мерседес-Бенц Рус» компаниясининг дистрибютор ҳуқуқларини ёки мулкини қўлга киритиш учун энг яхши имкониятга эга. Таъкидланишича, дилер ва концерн ўртасида «узоқ муддатли яхши муносабатлар» мавжуд.

 

Mercedes-Benz Россияда иккинчи энг машҳур премиум автомобиль бренди ҳисобланади (биринчиси BMW). 2021 йил охирида компания Россияда 43 мингта автомобиль сотган. АҚШ санкциялари туфайли ҳозиржа Россияга Mercedes GL етказиб беришнинг иложи йўқ.