Биз берилган ваъдалар ижросини кўришимиз керак—Мевлут Чавушўғли
Туркия Швеция ва Финляндиянинг НАТОга аъзолигини ратификация қилиш шартини айтди.
Туркия ҳукумати Мадрид меморандумининг амалга оширилишини кўрмаса, Швеция ва Финляндиянинг НАТОга аъзолиги ҳақидаги ҳужжатни парламентга юбормайди, деди Туркия ташқи ишлар вазири Мевлут Чавушўғли.
Мадриддаги НАТО саммитда Швеция, Финляндия ва Туркия хавфсизлик бўйича меморандумни имзоладилар. Бу Хелсинки ва Стокголмнинг алянсга аъзо бўлиш бўйича музокаралар бошланишига замин яратди. Мамлакатлар терроризмга қарши курашда ҳамкорликни кучайтириш, жумладан, Туркияда тақиқланган Курдистон ишчилар партиясига қарши чоралар кўриш, маълумот алмашиш ва экстрадиция бўйича келишиб олди.
“Парламентга юборишдан олдин имзоланган Мадрид меморандумининг бажарилишини кўришимиз керак. Парламент мени тўғри тушунсин, лекин уни жўнатишдан олдин ҳужжат ижросини кўришимиз керак. Бизга берилган ваъдалар амалга ошмаса, бизда вето ҳуқуқи бор”, — деди Чавушўғли.
Ҳозирга қадар НАТОнинг қатор давлатлари протоколларни аллақачон ратификация қилган.
