Навоийда 980 млн сўм кредит ўзлаштириб юборилди
Ҳозирда мазкур ҳолат юзасидан жиноят иши қўзғатилган.
Кармана туманида кредит маблағларини ўзлаштирган МЧЖ раҳбарлари аниқланди, дея хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Маълум қилинишича, Департаментнинг Кармана туман бўлими томонидан терговга қадар текширув ўтказилган. Унда “A. Z.” МЧЖ раҳбари А. Ю. ва “R. L.” МЧЖ масъул шахслари ўзаро тил бириктириб, тадбиркор И. Ш.нинг ишончига кириб, унга қарашли иссиқхона ҳужжатларини қалбакилаштириш орқали “A.Z.” МЧЖ номига ҳудудий тижорат банки филиалидан 980 млн сўм имтиёзли кредит ажратилишига эришиб, ушбу кредит маблағларини нақдлаштириб олиб, ўзганинг мулкини фирибгарлик йўли билан қўлга киритганликлари аниқланган.
Ҳозирда мазкур ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
