Германияда кўмир электр станцияси қайта ишга туширилди
Мамлакатда энергия тақчиллиги туфайли кўмир ва мазут электр станциялари фаолияти қайта тикланади.
Шунга қарамай, Германия Федератив Республикаси ҳукумати иқлим инқирозига қарши курашга содиқлигини тасдиқлашда давом этмоқда.
«Германиянинг биринчи захира кўмир электр станцияси тез орада қайта ишга туширилади. Гап Ганновер ва Брауншвейг ўртасидаги Қуйи Саксония штатининг Хоэнхамельн шаҳрида жойлашган Мерум (Kraftwerk Mehrum) иссиқлик электр станцияси ҳақида кетмоқда», — деб хабар қилди Бонн Федерал тармоқ агентлиги.
14 июлдан бошлаб Германияда захира энергия деб аталадиган кўмир ва мазут электр станцияларини қайта ишга туширишга рухсат берилди. Июнь ойида Германияда табиий газ асосида электр энергиясининг 11,2 фоизи ишлаб чиқарилган.
Германия ҳукумати қарори 2023 йил апрел ойи охиригача захирадаги қазилма ёқилғи электр станцияларидан электр энергиясини сотишга рухсат беради. Уларнинг вақтинча қайта ишга туширилиши электр станциялари операторлари учун иқтисодий манфаатдордир. Чунки ҳозирда электр энергиясининг улгуржи нархи юқори. Айни пайтда жаҳон бозорида тошкўмир етарли.
