Ненси Пелоси яна бир хавфли ҳудудга бормоқчи
Аввалроқ у Хитой қаршилигига қарамай, Тайванга ташриф буюрганди.
АҚШ Конгресси Вакиллар палатаси спикери Ненси Пелоси Сеулда Жанубий Корея Миллий Ассамблеяси спикери Ким Жин Пё ва парламентнинг бошқа аъзолари билан учрашди.
Томонлар минтақавий хавфсизлик, иқтисодий ҳамкорлик, шунингдек, иқлим масалаларини муҳокама қилган.
Жанубий Корея расмийларига кўра, Пелоси демилитаризация қилинган ҳудуд – Жанубий ва Шимолий Корея чегарасига ҳам боришни режалаштирган. Агар Вакиллар палатаси спикери шундай қилса, бу америкалик сиёсатчининг АҚШнинг собиқ Президенти Доналд Трамп Шимолий Корея етакчиси Ким Чен Ин билан 2019 йилда учрашганидан бери биринчи ташрифи бўлади.
Шундан сўнг Пелоси Жанубий Корея Президенти Юн Сук Ёл билан телефон орқали мулоқот қилишни режалаштирган.
Эслатиб ўтамиз, 2 август куни Ненси Пелоси оролни ўз ҳудуди деб билувчи Хитойнинг норозиликлари ва таҳдидларига қарамай, Тайванга ташриф буюрган эди.
