АҚШнинг Индиана штатида кучли портлаш рўй берди
Оқибатда 3 киши ҳалок бўлгани айтилмоқда.
AҚШнинг Индиана штатидаги Эвансвилл шаҳрида турар-жой биноси портлади. Бу ҳақда USA Today нашри хабар берди.
Портлаш оқибатида 3 киши ҳалок бўлган. Расмийлар уй жойлашган кўча вайроналарга тўлиб кетгани, қўшни бинолар жиддий шикастланганини таъкидламоқда. Барча ёнғинлар ўчирилган. Портлаш содир бўлган ҳудудда электр таъминотида узилишлар мавжуд. Полиция воқеа жойидан яқин атрофдаги кўчаларни тўсиб қўйгани айтилмоқда.
Эвансвилл ўт ўчириш хизмати бошлиғи Майк Коннели хабарига кўра, портлаш радиуси 30 метрдан ошиб, 40 га яқин уйга зарар етказган, шундан 11 та бино эса яшаш учун яроқсиз деб топилган.
Вандербург округи расмийлари уч киши ҳалок бўлганини тасдиқлади, Н.Вайнбах проспектидаги портлаш қурбонларини қидириш давом этмоқда.
Айни дамда воқеа жойида Федерал бюро томонидан спиртли ичимликлар, тамаки, ўқотар қуроллар ва портловчи моддалар бўйича тергов ишлари олиб борилмоқда. Ҳозирча портлаш сабаблари аниқланмаган.
Қизил Хочнинг маҳаллий бўлими жабрланганларга ёрдам кўрсатиб, уларни вақтинчалик бошпана, озиқ-овқат ва сув билан таъминламоқда.
