Етакчи экспертлар афғон активлари бўйича Байденга хат ёзди
Улар музлатиб қўйилган маблағларни қайтаришга чақирган.
Дунёнинг 72 нафар иқтисодчиси ва экспертлари АҚШдан музлатиб қўйилган афғон активларининг қайтаришни сўради. Бу ҳақда Reuters агентлиги хабар берди.
Улар орасида Нобель мукофоти совриндори Жозеф Стиглиц, Грециянинг собиқ молия вазири Янис Варуфакис, шунингдек, АҚШ, Буюк Британия, Германия ва ҳиндистонлик экспертлар бор. Иқтисодилар Жозеф Байден ва Қўшма Штатлар молия вазири Жанет Йеллен номига очиқ хат йўллаган.
Унда қайд этилишича, Американинг бу қадамлари афғон халқининг оғир аҳволини янада қийинлаштирган. Экспертлар халқ толиблар ҳукуматини танламаганини, олтин-валюта захираларисиз эса Марказий банк иқтисодиётни қўллаб-қувватлай олмаслигини таъкидлаган.
Бундан ташқари, қайтарилган активлар гуманитар инқирознинг олдини олиши ва иқтисодиётни тиклашга ёрдам бериши айтилган.
Маълумот ўрнида: “Толибон” 2021 йилда Афғонистондаги марказий ҳокимиятни эгаллагач, АҚШ аввалги ҳукумат даврида тўпланган 9 миллиард долларлик захираларни музлатиб қўйди. Жаҳон ҳамжамияти Вашингтонни ушбу маблағларни қайтаришга чақириб келмоқда. Хусусан, ўтган ойда Тошкентда бўлиб ўтган “Афғонистон: хавфсизлик ва иқтисодий тараққиёт” халқаро конференциясида бу масала алоҳида қайд этилди.
Аввалроқ толиблар даврида Афғонистонда ИШИД терактлари сони камайгани ҳақида хабар берилганди.
