Толибон ваъдасида тура олмади
БМТ экспертлари Афғонистон келажагини “қоронғи” деб баҳоламоқда.
Бирлашган Миллатлар Ташкилотининг мустақил экспертлар гуруҳи халқаро ҳамжамият афғон ҳукуматининг инсон ҳуқуқларини ҳурмат қилишга қаратилган саъй-ҳаракатларини кучайтиришга чақирди.
“Агар халқаро ҳамжамият Толибонни инсон ҳуқуқлари бўйича мажбуриятларини бажаришга ундаш учун кўпроқ ҳаракат қилмаса, Афғонистоннинг келажаги ниҳоятда қоронғи бўлади”, — дейилади экспертлар баёнотида.
Мутахассисларнинг фикрича, Толибон кўплаб инсон ҳуқуқлари бузилишига йўл қўйган, улардан энг даҳшатлиси аёллар ва қизларнинг ижтимоий ҳаётдан виртуал четлатилгани, шунингдек, уларга мунтазам равишда тазйиқ ўтказилаётгани.
Экспертларга кўра, Толибон нафақат ўз ваъдаларини бажара олмади, балки улар ўтган йигирма йил давомида эришилган ютуқларнинг катта қисмини ўзгартирган.
Мутахассислар, шунингдек, халқаро ёрдамнинг айрим каналлари тўхтатилиши ва Афғонистоннинг хориждаги активларининг музлатиб қўйилгани туфайли мамлакатда гуманитар ва иқтисодий инқирознинг чуқурлашиб бораётганидан ташвишда.
