Пхеньян БМТ Бош котибини танқид қилди
Мамлакат расмийлари Гуттеришни “мавқеига путур етказадиган сўзлар”дан тийилишга чақирган.
Шимолий Корея Ташқи ишлар вазирлиги БМТ КХДР суверенитетига тажовуз қилаётганини, мамлакатда ядро қуролини бутунлай йўқ қилиш тарафдори эканини айтди. Бу ҳақда Шимолий Кореянинг KCNA ахборот агентлиги маълум қилди.
Ушбу баёнот БМТ Бош котиби Антониу Гутерришнинг Шимолий Кореяни тўлиқ ядросизланишига содиқлиги ҳақидаги сўзларига жавобан берилди. Шимолий Корея расмийларига кўра, БМТ бош котиби “халқаро амалдор сифатидаги мавқеига путур етказиши мумкин бўлган” ҳар қандай ҳаракат ва сўзлардан ўзини тийиши керак.
Шимолий Корея бу йил 30 дан ортиқ баллистик ракеталарни синовдан ўтказди. Бундан ташқари, Сеул ва Вашингтон расмийлари КХДР яна ядро қуролини синовдан ўтказишга тайёрланаётган бўлиши мумкинлигини тахмин қилмоқда.
