Навоийда газга тўланган 121 млн “еб юборилди”
Уни “Конимехтумангаз” ходими талон-тарож қилган.
Конимех туманида аҳолига суюлтирилган газ сотишдан тушган маблағларни ўзлаштириш ҳолати аниқланди, дея хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Маълум қилинишича, Департаментнинг Конимех туман бўлими томонидан терговга қадар текширув ўтказилган. Унда “Конимехтумангаз” бўлимида ҳисоб бўйича техник вазифасида ишловчи Р. Б. аҳолига тарқатилган суюлтирилган газ учун фуқаролар томонидан тўланган 121,3 млн сўмни “Ҳудудгаз Навоий” ҳисоб-рақамига кирим қилмасдан, ўзлаштириш йўли билан талон-торож қилгани аниқланган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.
