Норвегия Россияга қарши санкцияларнинг 7-пакетига қўшилди
“Биз Россияга нисбатан босимни сақлаб қолмоқчимиз”, дейди мамлакат ташқи ишлар вазири.
Норвегия жорий йилнинг 21 июль куни Россияга қарши киритилган Евроиттифоқ санкцияларининг еттинчи пакетига қўшилди. Бу ҳақда мамлакат ташқи ишлар вазирлиги баёнотида маълум қилинган.
“Биз Россия раҳбарияти ва рус элитаси вакилларига босимни сақлаб қолиш учун санкцияларни қўллаш бўйича яна бир бор ЕИ билан ҳамкорликда ҳаракат қилмоқдамиз”, — деган Қироллик ташқи ишлар вазири.
Норвегия қўшилган мазкур санкциялар Россия билан бизнес юритиш имкониятларини янада камайтиради. Бундан ташқари, 50 дан ортиқ жисмоний шахсга ва 10 та юридик шахсга нисабатан чекловлар жорий этилади. Улар орасида Россия Свербанки ҳам бор.
Шунингдек, еттинчи санкциялар пакети олтинни тўғридан-тўғри ва билвосита олиб кириш, сотиб олиш ёки ўтказишни тақиқлашни назарда тутади.
