Покистон халқаро ҳамжамиятдан ёрдам сўради
Мамлакат даҳшатли тошқин гирдобида қолган.
Покистон Бош вазири Шаҳбоз Шариф мамлакати вайронкор сув тошқинларидан қаттиқ жабр кўргани сабабли халқаро ҳамжамиятдан ёрдам сўради. "Associated Press" хабарига кўра, қутқарувчилар одамлар эвакуация қилинишини кутаётган кўплаб ҳудудларга ҳалигача етиб бора олмаяпти.
Шаҳбоз Шариф хорижий дипломатлар ва турли ташкилотлар вакиллари билан учрашди. БМТ Покистонга ёрдам бериш учун 3 миллион доллар ажратишини айтмоқда.
Июнь ойининг ўрталаридан бери Покистондаги сув тошқинлари оқибатида мингдан ортиқ киши ҳалок бўлди, уларнинг учдан бири болалардир. Табиий офат туфайли мамлакат ҳукумати фавқулодда ҳолат эълон қилган.
Сув оқими оқибатида 170 мингдан ортиқ уй вайрон бўлган, йўллар ювилиб кетган, 150 га яқин кўприк қулаб тушган.
