Навоийда ўқитувчилар байрам кунлари навбатчиликка қўйилди
Бу профилактика инспекторининг оғзаки буйруғи билан амалга оширилган.
Ижтимоий тармоқда Навоий вилоятининг Хатирчи туманида 22-умумий ўрта таълим мактаби ўқитувчилари баёрам кунларида кучайтирилган навбатчиликка жалб этилгани ҳақида хабарлар тарқалди. Ҳолат юзасидан туман ХТБ расмий муносабат билдирди.
Аниқланишича, ҳудуд профилактика инспектори томонидан Ўзбекистон Республикаси Мустақиллигининг 31 йиллиги муносабати билан байрам кунлари мактабларда туну кун навбатчиликни жорий этиш тўғрисида оғзаки топшириқ берилган. Ўз навбатида у мактаб директорларига телефон орқали топшириқни етказган ва рўйхат ташлаб беришни сўраган. Шу тариқа мактабларда 2022 йилнинг 31 августидан 2022 йил 5 сентябригача рўйхат шакллантирилган.
Мактаб ўқитувчилари билан ўтказилган суриштирув натижасида рўйхат шунчаки расмиятчилик учун тузилгани, бирорта ўқитувчи қайд этилган кунларда навбатчиликда турмагани маълум бўлган.
Мазкур ҳолат юзасидан мактабнинг ЧҚБТ раҳбари Н.Рузиев ҳамда директор Ж.Қаршиев огоҳлантирилган.
