Навоийдаги боғчада болалар оммавий заҳарлангани айтилди
Ҳолатга вилоят прокуратуаси изоҳ берди.
Ижтимоий тармоқларда Навоий вилоятининг Кармана туманидаги 6-сонли МТТда болалар оммавий заҳарлангани ҳақида хабарлар тарқалди. Ҳолат юзасидан вилоят прокуратураси расмий муносабат билдирди.
Қайд этилишича, 9 сентябрь куни соат 17:00 да Кармана туман тиббиёт бирлашмаси юқумли касалликлар бўлимига 10 нафар вояга етмаган бола умумий ҳолсизлик, қусиш ва ич кетиши каби клиник белгилар билан ётқизилган.
Ушбу белгилар бўйича беморларга юқумли касалликлар бўлими томонидан “ошқозон-ичак фаолиятининг бузилиши” ташхиси қўйилиб, уларнинг 9 нафарига биринчи тез тиббий ёрдам кўрсатилган ва аҳволи қониқарли бўлганлиги сабабли касалхонадан чиқарилган.
Ҳозирда 1 нафар бола ўткир респератор, юқори нафас йўлларининг шамоллаши ташҳиси билан даволанмоқда.
Мазкур ҳолат юзасидан Кармана туман прокуратураси томонидан терговга қадар текшириш ҳаракатлари олиб борилаётган бўлиб, экспертиза текшируви учун тегишли намуналар олиниб, суд-тиббий экспертизаси тайинланган.
“Терговга қадар текшириш натижаси бўйича қонуний қарор қабул қилиниши таъминланади”, — дейилади хабарда.
