Арманистон ва Озарбайжон ўртасида яна кескинлик
Пашинян Путинга ярим кечаси қўнғироқ қилди.
Арманистон ўзаро ёрдам шартномасини қўллашни сўраб, Россияга мурожаат қилмоқчи, деб ёзади "РИА Новости".
Бундай қарор бош вазир Никол Пашинян раислигидаги мамлакат Хавфсизлик кенгаши йиғилишида қабул қилинди. У кечаси Россия президенти Владимир Путинга қўнғироқ қилиб, кескинлашган можаро ҳақида гапирган, деб хабар қилди Арманистон ҳукумати матбуот хизмати.
"Бош вазир Озарбайжон қуролли кучларининг Арманистон суверен ҳудудига қарши ярим тунда бошланган, артиллерия ва йирик калибрли ўқотар қуроллардан ўққа тутилган провокацион ҳаракатлари тафсилотларини тақдим этди", — дейилади хабарда.
Ўз навбатида, Озарбайжон Мудофаа вазирлиги чегарадаги ҳарбий можарони Арманистон қуролли кучларининг кенг кўламли провокацияси деб атади.
“Озарбайжон армиясининг Дашкесан, Калбажар ва Лочин вилоятларидаги айрим позициялари, бошпаналари ва истеҳкомлари Арманистон Қуролли кучлари бўлинмалари томонидан интенсив ўққа тутилди”, — дейилади Озарбайжон хабарида.
