Никол Пашинян Самарқанддаги ШҲТ саммитида қатнашмайди
Бунга чегарадаги вазият сабаб бўлган.
Арманистон Бош вазири Никол Пашинян мамлакатдаги вазият туфайли Самарқандда бўлиб ўтадиган ШҲТ саммитида иштирок этмайди. Бу ҳақда ҳукумат матбуот хизмати хабар қилди.
Эслатиб ўтамиз, 13 сентябрга ўтар кечаси Озарбайжон-Арманистон чегарасида ҳарбий тўқнашув юз берганди. Томонлар ўқ отишни бошлаганликда бир-бирини айблаган.
Бунга Ўзбекистон ТИВ муносабат билдириб, вазиятдан чиқиш учун сиёсий ва дипломатик музокаралар олиб боришга даъват этганди.
“Ўзбекистоннинг ишончи комилки, барча масалалар ва мавжуд муаммоларни ҳал қилишнинг ягона тўғри йўли бу халқаро ҳуқуқ асосида ва илгари эришилган келишувлар доирасида тинчлик музокаралари ва маслаҳатлашувлар йўлидир.
Биз тинчлик шартларига қатъий риоя қилиниши, ҳар қандай шароитда ҳам вазминликнинг намоён бўлишига умид қиламиз ҳамда томонларни мавжуд аҳволни барқарорлаштириш, вазиятдан чиқиш учун сиёсий ва дипломатик музокаралар олиб боришга даъват этамиз”, — дейилади вазирлик баёнотида.
