Россия санкциялар азобини ҳис қилиши керак - Пелоси
Ненси Пелоси уруш тугамагунча санкциялар тўхтамаслигини айтди.
АҚШ Конгресси Вакиллар палатаси спикери Ненси Пелоси Россия бошлаган уруш тугамагунча Россияга қарши санкцияларни кучайтиришга чақирди. Бу ҳақда у Берлинда Г7 парламентлари раисларининг матбуот анжуманида маълум қилди.
“Бунинг учун муҳим хавфсизлик ёрдами, инсонпарварлик кўмаги, иқтисодий ёрдам ва санкциялар керак, бунинг азобини Россия ҳис қилиши даркор”, - деди у.
Пелоси жанговар ҳаракатлардан сўнг Украинани қайта тиклаш зарурлигини таъкидлади ва бунинг учун музлатилган Россия активларидан фойдаланишни таклиф қилди.
Аввалроқ ЕИ 1 206 нафар россиялик ва Россия Федерациясининг 108 та муассасасига нисбатан санкцияларни узайтиргани хабар қилинганди.
Эслатиб ўтамиз, Олий Рада спикери Руслан Стефанчук АҚШ Конгресси Вакиллар палатаси спикери Ненси Пелоси билан учрашув ўтказган ва унга Украинанинг ҳарбий эҳтиёжлари рўйхатини топширган эди.
