Тайвандаги кучли зилзила бўйича қўшимча маълумот берилди
Зилзила оқибатида қурбон ва жабрланганлар бор.
Якшанба куни Тайванда содир бўлган 6,9 магнитудали кучли зилзила оқибатида бир киши вафот этди, 142 киши жабрланди. Бу ҳақда The Paper хабар берди.
Кучли силкинишлар бутун оролда сезилди. Табиий офат натижасида бир қанча бинолар қулаган, иккита кўприк вайрон бўлган, поезд рельсдан чиқиб кетган. Электр узилишлари юз берди. Душанба куни Тайван оролидаги Хуалян ва Тайдуннинг бир қатор округ ва туманларида мактабларда дарслар бекор қилинди.
Аввал хабар қилинганидек, шанба куни кечқурун Тайванда содир бўлган 6,5 (айрим манбаларда 7,2) магнитудали зилзиладан сўнг 100 дан ортиқ ер силкинишлари қайд этилган. Ер силкинишлари бутун Тайван оролида, шунингдек, Тайван бўғозининг нариги томонидаги Фуцзян ва Чжецзян провинцияларида ҳам сезилган.
