Ўзбекистонда Япония чойини етиштириш йўлга қўйилди
Ҳозирда синовдаги чой ўсимлиги мамлакатда яхши ўсмоқда.
Республиканинг денгиз сатҳидан 600-1500 метр баландликда жойлашган тоғ ва тоғолди ҳудудлари, жумладан, Сурхондарё, Қашқадарё, Жиззах, Тошкент ва Фарғона водийси вилоятларида чой кўчатлари экилиб, Ўзбекистон тупроқ-иқлим шароитига мослаштириш бўйича илмий изланишлар олиб борилмоқда. Бу ҳақда Қишлоқ хўжалиги вазирлиги Матбуот хизмати хабар қилди.
Қайд этилишича, Тошкент давлат аграр университети томонидан Токио қишлоқ хўжалиги ва технологиялари университети билан ҳамкорликда “саямакаори”, “фукимидори”, “хокимей”, “фушин”, “саямадори” каби чой навлари кўчириб келтирилиб, Ўзбекистон ерларида синовдан ўтказилмоқда. Ҳозирда синовдаги чой ўсимлиги мамлакатда яхши ўсмоқда.
Эслатиб ўтамиз, Президент Ш.Мирзиёевнинг Японияга ташрифи доирасида Ўзбекистонда чой ўсимлигини етиштириш бўйича келишувга эришилган эди.
