Ливанда бўш бюллетенлар президент сайловида ғолиб бўлди
Депутатларнинг катта қисми номзодларга овоз бермаган.
Ливанда янги давлат раҳбарини сайлашга биринчи уриниш бесамар кетди. Овозлар саналгач, депутатларнинг катта қисми бюллетенларни бўш қайтаргани маълум бўлган.
“Reuters” нашрининг ёзишича, янги президентни сайлашда 122 нафар депутат қатнашган. 36 киши Мишель Моавадга, 11 киши Салим Эддага овоз берган, қолганлар ҳеч кимни танламаган.
Йиғилган овозлар президентни сайлашга етарли эмас. Шунинг учун Мишель Наим Аун президент мажбуриятларини бажаришда давом этади.
Ливанда диний тегишлилик туфайли мураккаб сайлов тизими амал қилади. Мамалакат президенти этиб фақат христиан-маронийлар, бош вазир қилиб эса мусулмонлар сайланади. Парламентнинг 128 депутатидан 64 нафари мусулмонлар, қолганлари христианлардир.
