Қозоғистон Президентига суиқасд уюштирмоқчи бўлган шахс 17 йилга қамалди
Унга нисбатан террорчилик акти ва гиёҳванд моддалар ташиш бўйича айбловлар ҳам қўйилган.
Қозоғистон Президентига суиқасд уюштирмоқчи бўлган фуқаро 17 йилга озодликдан маҳрум этилди, дея хабар бермоқда Остона шаҳар суди матбуот хизмати.
Қайд этилишича, 28 сентябрь куни Остoна шаҳрида ёпиқ суд мажлиси бўлиб ўтган. Унда судланувчига нисбатан давлатга хиёнат қилиш, яширин тарзда ўқотар қуроллар олиб ўтиш, портловчи моддаларни ноқонуний ишлаб чиқаришга тайёргарлик кўриш ҳамда Қозоғистон Республикаси Президентининг ҳаётига тажовуз қилиш каби айбловлар қўйилган.
Шунингдек, жиноий моддалар қаторида террорчилик ҳаракатига тайёргарлик кўриш, ҳуқуқни муҳофаза қилиш органлари ва ҳарбий хизматчиларнинг ҳаётига тажовуз қилиш каби айбловлар ҳам бор.
Эслатиб ўтамиз, жорий йилнинг апрел ойида Қозоғистон Миллий хавфсизлик қўмитаси республика президенти ва юқори мартабали амалдорларга суиқасд уюштиришни режалаштирган хорижий разведка агенти ҳибсга олинганини эълон қилганди.
