Зарафшон дарёсида 4 мингдан ортиқ балиқ нобуд бўлди
Бош прокуратура ҳолат юзасидан маълумот берди.
Ижтимоий тармоқда Навоий вилоятининг Зарафшон дарёсида минглаб балиқлар нобуд бўлгани ҳақида хабарлар тарқалди. Ҳолат юзасидан вилоят прокуратураси расмий баёнот эълон қилди.
Маълум қилинишича, 2022 йилнинг 4-5 сентябрь кунлари “Навоиязот” акциядорлик жамиятига қарашли 1-ташланмаси (267-сонли қудуқ) орқали Зарафшон дарёсига меъёридан ортиқ даражада ифлосланган сувлар оқизилаётганлиги натижасида дарёдаги 2 млрд 613 млн 510 минг сўмлик жами 4204 дона турли хилдаги балиқлар нобуд бўлган.
Мазкур ҳолат юзасидан жорий йилнинг 8 октябр куни Навоий вилоят ИИБ ҳузуридаги тергов бошқармаси томонидан “Навоиязот” АЖ мансабдор шахслари ва бошқаларга нисбатан Ўзбекистон Республикаси Жиноят кодексининг 196-моддаси 1-қисми билан жиноят иши қўзғатилиб, тергов ҳаракатлари олиб борилмоқда.
Навоий вилояти прокуратураси органлари томонидан тергов жараёни назоратга олинган.
