Эрон Озарбайжон ва Арманистон ўртасида воситачи бўлмоқчи
Бу бўйича Раисий Алиевга таклиф киритди.
Эрон президенти Иброҳим Раисий Теҳрон Боку ва Ереван ўртасида воситачи бўлишга тайёрлигини маълум қилди. Бу ҳақда “Интерфакс” нашри ёзмоқда.
Қайд этилишича, у бу таклифни Қозоғистон пойтахти Остона шаҳрида Озарбайжон президенти Илҳом Алиев билан бўлган учрашувда билдирган.
“Эрон Озарбайжон Республикаси ва Арманистон ўртасидаги келишмовчиликларни ҳал қилиш учун ўзининг катта салоҳиятидан фойдаланишга тайёр”, — дея таклиф қилган Раисий.
Алиев ва Раисий Остонада Осиёда ҳамкорлик ва ишонч чоралари бўйича конференсиянинг олтинчи саммити доирасида учрашган.
