Илон Маск Twitter'ни сотиб олса, компания ходимларининг 75 фоизини қисқартиради
Ҳозирда ижтимоий тармоқда 7500 нафар ходим ишлаши айтилмоқда.
Euronews хабарига кўра, Tesla компанияси раҳбари Илон Маск Twitter'ни сотиб олса, компания ходимларининг 75 фоизи ишдан бўшатилишини маълум қилди.
The Washington Post газетаси ўз манбалари ва ҳужжатларига таяниб, компанияни ким сотиб олса, келаси ойларда ишчилар сони ва иш ҳақининг қисқаришига дуч келишини айтди.
Ижтимоий тармоқ, шунингдек, инфратузилмасини, хусусан, маълумотлар марказларини қисқартирмоқда.
Нашр маълумотларига кўра, Twitter'да ҳозирда 7500 нафар ходим ишлайди. Илон Маскнинг режаси амалга ошса, компанияда 2 мингга яқин ишчи қолади. Twitter ўз ходимларини қисқартириши ҳақидаги хабарларни рад этмоқда.
Маск апрель ойида ижтимоий тармоқни 44 миллиард долларга сотиб олмоқчи эканлигини маълум қилган. Май ойида эса компаниядан сохта аккаунтлар ҳақида маълумот ололмаган тадбиркор компанияни сотиб олишдан бош тортишини маълум қилди. Ўшанда Twitter Маскни судга берган эди. Октябрь ойи бошида Маск музокараларни давом эттирди. Суд унга сотиб олиш шартномасини якунлаш учун 28 октябргача вақт берди.
