Зеленский 13 нафар хориж сиёсатчиларини тақдирлади
Улар орасида Ненси Пелоси ҳам бор.
Украина Президенти Владимир Зеленский Киевнинг ҳамкор давлатлари парламентлари спикерларини иккинчи даражали князь Ярослав Донишманд ордени билан тақдирлади.
Мукофотланганлар рўйхатидан 13 киши, жумладан, АҚШ Конгресси Вакиллар палатаси спикери Ненси Пелоси, Эстония парламенти спикери Юри Ратас, Франция парламенти сенати раиси Жерар Ларшер, Полша парламенти ҳар икки палатасининг раислари, Ирландия парламенти Сенати (юқори палатаси) спикери, Швейцария, Германия, Норвегия, Шимолий Македония, Латвия, Литва ва Хорватия қонун чиқарувчи органлари палаталари раҳбарлари ўрин олган.
Фармонда келтирилишича, улар “давлатлараро ҳамкорликни мустаҳкамлашдаги салмоқли шахсий хизматлари, Украинанинг давлат суверенитети ва ҳудудий яхлитлигини қўллаб-қувватлаганликлари, Украина давлатини дунёда оммалаштиришга қўшган салмоқли ҳиссаси учун” тақдирланган.
Аввалроқ Зеленский 109 нафар хорижий сиёсатчи, актёр, мусиқачи, жамоат арбоби, тадбиркор ва журналистни орден, медаль ва нишонлар билан тақдирлаган эди. Улар орасида Европа Комиссияси Президенти Урсула фон дер Ляен, Европа дипломатияси раҳбари Жозеп Боррел, АҚШ Давлат котиби Энтони Блинкен, Пентагон раҳбари Ллойд Остин, бизнесмен Ховард Баффет бор.
