Қозоғистон минтақада яшил энергия марказига айланишга тайёр
Бу ҳақда республика Бош вазири маълум қилди.
Қозоғистон қайта тикланувчи энергия манбаларини ривожлантириш бўйича минтақавий марказга айланиш имкониятига эга. Бу ҳақда Шарм ал-Шайхда бўлиб ўтаётган БМТнинг иқлим ўзгариши бўйича доиравий конвенцияси иштирокчиларининг 27-конференциясида республика бош вазири Алихан Смаилов маълум қилди.
“Қозоғистон дунёнинг яшил энергия марказларидан бирига айланиш салоҳиятига эга, шунинг учун биз қайта тикланадиган энергия манбаларини ривожлантириш бўйича минтақавий марказга айланишга ва умуман Марказий Осиёнинг яшил технологияларга ўтишини рағбатлантиришга тайёрмиз”, — дейди у.
Бош вазирнинг сўзларига кўра, ҳозирда республикада яшил энергиянинг умумий ишлаб чиқаришдаги улуши қарийб 3 фоизни ташкил этади. Шу билан бирга, 2030 йилга келиб унинг ишлаб чиқариш ҳажмини 7 ГВтга, 15 фоизгача ошириш ва шу билан бирга углерод чиқиндиларини камида 15 фоизга камайтириш режалаштирилган.
Смаилов, шунингдек, Қозоғистон 2060 йилгача углерод нейтраллигига эришишни ўз олдига устувор мақсад қилиб қўйганини эслатди.
Бундан ташқари, бош вазир мамлакат ҳукумати иқлим кун тартибидаги кенг кўламли масалалар бўйича барча халқаро ҳамкорлар билан ишлаш тайёрлигини маълум қилди.
