Twitter Маскка қимматга тушди: у апрелдан буён 70 миллиард доллар йўқотган
8 ноябрь куни миллиардернинг бойлиги 200 миллиард доллар кўрсаткичдан пастга тушди.
Дунёнинг энг бадавлат одами бўлган Илон Маскнинг бойлиги апрелдан буён 70 миллиард долларга камайди. Бу ҳақда Reuters хабар берди.
8 ноябрь куни миллиардернинг бойлиги 200 миллиард доллар кўрсаткичдан пастга тушган. Бу унинг компаниялари акциялари нархи пасайиши билан боғлиқ — гап биринчи навбатда Tesla ҳақида кетмоқда. Инвесторлар Маскнинг Twitter'га асосий эътибор беришидан чўчиб, акцияларини сотмоқда.
Оқибатда, Tesla ўзининг бозор нархининг ярмини йўқотди: ҳозирда компания 622 миллиард долларга баҳоланмоқда.
