Хитой ва Япония ер талашмоқда
Токио Пекинга айблов қўйди.
Япония Бош вазири Фумио Кисида Камбоджадаги Шарқий Осиё саммитида сўзлаган нутқида Хитойни Токионинг Шарқий Хитой денгизидаги суверенитетини бузаётганликда айблади. Бу ҳақда “Kyodo” ёзмоқда.
Япония раҳбари, шунингдек, Тайван атрофида барқарорлик минтақа хавфсизлигига таъсир қилувчи муҳим масала эканини айтди.
Эслатиб ўтамиз, июль ойи бошида Токио Пекинга икки Хитой қирғоқ қўриқлаш кемасининг Сенкаку архипелагига яқин сувларга киргани юзасидан норозилик билдирганди.
Архипелаг Япония томонидан назорат қилинади. Ҳукумат ороллар тарих ва халқаро ҳуқуқ нуқтаи назаридан Япония ҳудудининг ажралмас қисми эканлигини таъкидлайди.
Хитой бир неча бор Сенкаку архипелаги ва унга туташ ороллар қадим замонлардан бери Хитой ҳудуди бўлганлигини ва Пекин улар устидан шубҳасиз суверенитетга эга эканлигини расман эълон қилган.
