Буюк Британияда алкогольдан ўлим даражаси кескин ошди
Эълон қилинган маълумотларга кўра, ўтган йили мамлакатда рекорд даражадаги энг юқори кўрсаткич қайд этилган.
Буюк Британияда 2021 йилда алкоголь истеъмоли 10 мингга яқин одамнинг ўлимига сабаб бўлди. Бу ҳақда Британия Миллий статистика бошқармаси хабар бермоқда.
Эълон қилинган маълумотларга кўра, ўтган йили Буюк Британияда 9641 нафар алкоголь билан боғлиқ ўлим қайд этилган. Бу рекорд даражадаги энг юқори кўрсаткичдир.
Бешта ўлимнинг деярли тўрттаси жигар циррози, қолганлари спиртли ичимликлар билан боғлиқ руҳий касалликлар ва тасодифий заҳарланиш туфайли содир бўлган.
"Коронавирус пандемияси бошланганидан бери алкоголь билан боғлиқ ўлимлар кескин ўсди, алкоголли жигар касаллиги бу ўлимнинг асосий сабабидир. Бу ўсиш пандемия даврида спиртли ичимликларни истеъмол қилишнинг кўпайиши билан боғлиқ. Тадқиқотлар шуни кўрсатдики, пандемиядан олдин жуда кўп ичган одамлар, ушбу даврда спиртли ичимликларни кўпайтириши мумкин", — дейилади Миллий статистика бошқармаси хабарида.
2020-2021 йилларда алкогольдан ўлим даражаси кескин ошди. Ўтган йили 2019 йилга нисбатан 2 076 нафарга кўп (ўсиш 27,4 фоиз) спиртли ичимликлар ичиш оқибатида вафот этган.
