Бобур Бобомурод билан ижодий учрашув

 

Тошкент шаҳар, Мирзо Улуғбек туманидаги 338-мактабда шоир Бобур Бобомурод билан ижодий учрашув бўлиб ўтди.

 

“Назм гулшани” деб номланган бадиий кеча қишнинг совуқ кунларида ўтказилган бўлиши қарамай, ўқувчиларда илиқ таассурот қолдирди. Тадбир давомида иштирокчилар шоирнинг сўнги ижод намуналарини ижро этишди. Шунингдек, қизиқарли тарзда ташкил этилган саҳна кўриниши ҳам томашабинларнинг олқишига сазовор бўлди. Ўзаро бадиий мулоқот аввалида ўқувчилар томонидан ижро этилган куй-қўшиқлар ҳам айнан Бобур Бобомурод ижоди асосида саҳна юзини кўрди.

 

Шундан сўнг, мактабнинг шеъриятга ошно ўқувчилари ифодали шеър ўқиш бўйича беллашишди. Бир-биридан қизиқарли ва кучли ҳаяжон билан ўқилган шеърлар тадбирга ўзгача руҳ бағишлади. Ўқувчиларнинг ижроларини Бобур Бобомуроднинг ўзи баҳолади.

 

Тадбирда Бобур Бобомурод ижод оламига кириб келиши ва бугунги фаолияти ҳақида ўқувчиларга сўзлаб берди. Бухоро заминида туғилиб ўсгани, китобга меҳр қўйгани ва биринчи ёзган шеъри ҳақидаги хотиралар кўпчиликнинг кўз ўнгида яқин йиллар тасвирини жонлантирди:

 

“Ижод оламига кириб келишимга бувим сабабчи бўлган. Болалигимда кутубхоначи бўлишни орзу қилганман. Шунчалик кўп китобинг бўлсаки, уларни ўқиб тугатолмасанг. Бироқ, мана йиллар ўтиб ижодкор бўлиб шаклландим. Аммо, ҳозирги ютуқларимда китобларнинг ўрни беқиёс. Ҳозир ҳам кутубхоналарга интиладим. Китоб ўқишга шошиламан. Китоб бизни эзгу мақсад сари ундовчи йўлбошчи. Шунинг учун китоб билан дўст тутининг, китоб ўқишни ҳеч қачон канда қилманг”, — деди шоир.

 

Бундан ташқари учрашувнинг савол-жавоблар қисмида ўқувчилар ўзларини қизиқтирган бир қанча саволларга жавоб олишга муваффақ бўлишди.