Урганчда реклама афишасига урилган Cobalt ёниб кетди
Ҳолат юзасидан ФВБ маълумот берди.
Бугун, 10 декабрь куни Хоразм вилоятининг Урганч шаҳрида Cobalt ёниб кетди. Ҳолат юзасидан вилоят Фавқулодда вазиятлар бошқармаси маълумот берди.
Қайд этилишича, ҳодиса соат 20:22 ларда Урганч шаҳрининг Ал-Хоразмий кўчасида юз берган. 2001 йилда туғилган фуқаро Р. Б. Cobalt русумли автомобилда ҳаракатланаётиб, эътиборсизлиги оқибатида бошқарувни йўқотган ва йўлнинг ўнг томонидаги реклама афишасига бориб урилган. Шундан сўнг транспорт воситасининг мотор қисмида ёнғин келиб чиққан.
Воқеа жойига ёнғин-қутқарувчилар соат 20:25 да етиб бориб, ёнғинни 20:28 да бартараф қилишган. Мазкур ёнғин йўл транспорт ҳодисаси натижасида юзага келган. Оқибатда тан жароҳати олган ва ҳалок бўлганлар йўқ.
